«Валенсия» ҳимоячиси Мухтор Диакаби ирқчиликка қарши акцияда иштирок этмади.
«Валенсия» мухлислари «Реал» вингери Винисиус Жуниорни ҳақорат қилганидан сўнг Ла Лига ва Испания Қироллик футбол федерацияси (RFEF) ирқчиликка қарши акция уюштирди. Испания чемпионати 36-турининг ҳар бир ўйини олдидан футболчилар ва ҳакамлар «Ирқчилар, футболдан кетинг» ёзуви бўлган баннер олдида суратга тушишди.
Диакаби ушбу акциядан воз кечган биринчи футболчи бўлди. У жамоавий суратга тушмади.
Гвинеялик ҳимоячи бу ҳаракати орқали Ла Лиганинг номувофиқ қарорларидан норозилигини билдирди. 2021 йилда уни «Кадис» футболчиси Хуан Кала ирқий камситган, аммо лига исбот топа олмаган ва Кала жазоланмаганди.
