Яхшиямки, Чемпионлар лигаси бор эканки, бу нафақат ўша турнирнинг ўзи билан, балки миллий чемпионатлардаги қизғин курашларга сабаб бўлиши билан ҳам мухлисларга қувонч улашади. Кучли бешликдаги иккита лигада расман, яна иккитасида амалий жиҳатдан чемпион номи аниқ бўлиб улгурган бўлса-да, айнан ЕЧЛ ўринлари учун кураш сўнгги турларни кузатишимизга сабаб бўлиб қолмоқда. Италияда ЕЧЛ яримфиналчилари, Англияда «Юнайтед» ва «Ливерпуль» каби энг шонли тарихга эга бўлган клублар ЕЧЛда қатнашиш ҳуқуқини берадиган биргина йўлланма учун айёвсиз рақобатга киришишган. Қуйида ҳафтанинг эътиборли учрашувлари анонсини ҳавола қиламиз.
ЛИВЕРПУЛЬ – АСТОН ВИЛЛА (20 май, 19:00)
«Ливерпуль» қаторасига еттинчи ғалабасига эришди ва кеч уйғонган бўлса-да, Чемпионлар лигаси йўлланмаси учун курашда «Ньюкасл» ва «МЮ»ни таъқиб қилишда давом этмоқда. Уларнинг хатосидан фойдаланиш учун эса Клопп шогирдлари ўз ўйинларини ютишлари шарт. Ҳозирда топ-4дан 4 очколик фарқ ажратиб турибди ва мабодо «Юнайтед» қолган уч ўйиндан иккитасини юта олмаса, «Ливерпуль» азалий рақибини қувиб ўтиши мумкин. «Астон Вилла» эса айтиш керакки, мураккаб рақиб.
Эсингизда бўлса, уч йил олдин бирмингҳэмликлар «Ливерпуль» устидан кутилмаганда 7:2 ҳисобида ғалаба қозонган эди. Ўша ўйиндан бери жамоалар ўзаро 5 маротаба учрашишда ва ҳаммасида «Ливерпуль»нинг қўли баланд келди. Биринчи даврадаги ўйинда ҳам меҳмонлар 3:1 ҳисобида устун келгандилар. Аммо бу серия ҳаммаси осон бўлишини англатмайди, зеро Унаи Эмери «Астон Вилла»га келгач, жамоа ўйини ва натижалари тубдан ўзгарди. «Вилла» 17-поғонадан ҳозир еврокубоклар учун курашаётган клубга айланди. Ҳозир «Астон Вилла» «Тоттенҳэм» билан тенг очко тўплаб, 7-8 ўринларни бўлишиб турибди, 6-ўриндаги «Брайтон»дан 1 очко орқада холос. Бунинг устига сўнгги турда айнан «Брайтон»ни ўз майдонида қабул қилади. Яъни Европа лигаси йўлланмаларидан бирини қўлга киритиш учун Эмери шогирдларида реал имконият мавжуд. Табиийки, бунинг учун Ливерпулдан очкосиз қайтмаслик талаб этилади.
Таркибларга келсак, ҳар икки жамоада сўнгги ўйинларда майдонга тушаётган футболчилар тайёр. Мезбонлар сафида Наби Кейтанинг йўқлиги янгилик эмас, Дарвин Нуньез ҳам майдонга туша олмайди. Ҳозирда Жота, Диас каби ҳужумчилар жароҳатдан тиклангач, уругвайлик ҳужумчининг йўқлиги сезилмаса керак. Шунингдек, Роберто Фирмино Жеймс Милнер билан бирга «Энфилд»даги сўнгги учрашувини ўтказади. Клопп бразилиялик футболчига ҳам имконият берса керак. Меҳмонлар сафида эса ўз вақтида «Ливерпуль»нинг етакчиси бўлган Коутиньо шерикларига ёрдам бера олмайди. Калум Чемберснинг учрашувда қатнашиши сўроқ остида қолмоқда.
БАВАРИЯ – ЛЕЙПЦИГ (20 май, 21:30)
«Боруссия»нинг қоқилишидан сўнг, «Бавария» чемпионлик учун илдам одимламоқда. Бошқа йўл ҳам йўқ, зеро бу мюнхенликлар учун мавсумдаги ягона соврин бўлади. Жамоа Бундеслигадаги сўнгги уч ўйинда ғалаба қозонди, охиргиси «Шальке» устидан 6:0 ҳисобида қўлга киритилди. Қолган икки ўйиндаги ғалаба жамоани қаторасига 11-бор мамлакат чемпионига айлантиради. Аммо биргина йўқотиш «Боруссия»га имконият тақдим этиши мумкин.
Сўнгги тур ўртамиёна «Кёльн»га қарши кечишини инобатга олсак, айнан бугунги тўқнашув «Бавария» учун ҳал қилувчи бўлади. Зеро «Лейпциг» охирги йилларда Германия футболида ўз ўрни ва сўзига эга, бунинг устига жамоа Чемпионлар лигаси йўлланмаси учун курашмоқда. Мағлубият «Лейпциг»ни сўнгги тур олдидан 5-ўринга тушиб юбориши мумкин. «Шарқликлар» нима қилиб бўлса ҳам Мюнхенда ғалаба қозониш ва ЕЧЛ йўлланмасини нақдлаштириш учун ҳаракат қилиши табиий.
Умуман, айниқса, Мюнхендаги учрашувларда «Лейпциг» муносиб қаршилик кўрсатиб келишини алоҳида таъкидлаш керак. Ўтган мавсумда мезбонлар зўрға 3:2 ҳисобида устун келган. Ундан олдинги 2 ўйин эса, дуранг билан якунланган. Шу мавсумдаги биринчи давра ўйини ҳам 1:1 ҳисобида тугаган. Дуранг ҳеч бир шаклда «Бавария»ни қониқтирмайди.
«Бавария» таркибида Алфонсо Дэйвис ва Эрик Шупо-Мотинг мавсум охиригача сафдан чиққани маълум. Жамоа қарийб бир ойдан бери уларсиз ўйнаб келмоқда. Меҳмонлар таркибидаги йўқотиш жиддийроқ – Дани Ольмо бир неча кунга сафдан чиққан ва катта эҳтимол билан ушбу учрашувни ўтказиб юборса керак.
МАНЧЕСТЕР СИТИ – ЧЕЛСИ (21 май, 20:00)
«Арсенал»нинг «Брайтон»даги мағлубияти «Сити»га ёрдам бериб юборди. Сўнгги тургача интригани ушлаб туриши тахмин қилинган чемпионлик пойгаси «Манчестер Сити»нинг ўз ўлжасини қачон қўлга киритиши ҳақидаги саволга айланиб қолди холос. Жамоа қолган уч ўйиндан биттасини ғалаба билан якунласа, расман чемпион бўлади. Табиийки, «Челси» билан ўйинда ғалаба қозониш ҳар томонлама манчестерликлар учун энг яхши сценарий.
Биринчидан, «шаҳарликлар» кейинги турларни сафарда, «Брайтон» ва «Брентфорд»га қарши ўтказади. Табиийки, чемпионликни «Этиҳад»да, тағинам «Челси»га қарши ўйинда нишонлаш бошқача ҳиссиётлар тақдим этиши шубҳасиз. Бундан ташқари, «Манчестер Сити»ни АПЛдан ташқари яна икки финал кутиб турибди. Июнь ойи бошида Англия кубогида «Манчестер Юнайтед» билан, ҳамда бир ҳафта ўтиб Истанбулда ЕЧЛ финали «Интер» билан. Бу ўйинлардаги ғалаба «Манчестер Сити»ни треблга олиб боради. Инглиз жамоалари ичида шундай натижага эришган иккинчи жамоага айланиш «Сити» учун катта воқелик. Ўша ўйинларга анча хотиржам тайёрланиш, футболчиларни яхши спорт формасида етиб боришлари учун албатта, АПЛ чемпионлиги имкон қадар тезроқ қўлга киритилиши керак.
«Челси» ўз қобиғида яшашда давом этмоқда. Жамоа мухлислари интизорлик билан мавсум тугашини ва кейингиси бошланишини кутаётган бўлишлари табиий. «Челси» 11-ўриндан юқорига кўтарила олмайди, у қадар пастга тушиб кетмаса ҳам керак. Аммо бир жиҳат – «Челси»нинг сўнгги уч ўйини – «Манчестер Сити», «Манчестер Юнайтед» ва «Ньюкасл»га қарши. Анча истеъдодли ижрочилардан йиғилган таркиб, мавсумда ҳар қандай вазиятда бўлмасин, сўнгги турларни бошқача руҳда ўтказиш, албатта, келаси мавсум учун қандайдир ишонч бериши мумкин. Чемпионлик масаласи ҳам, ЕЧЛ ўринлари учун кураш ҳам қарангки, «Челси» билан ҳал бўладигандек.
Ўзаро ўйинларга келсак, ўша Чемпионлар лигаси финалидаги ғалабадан буён «Челси» «Манчестер Сити»ни ютиш тугул, дарвозасига бирорта гол ҳам ура олмаяпти. Гвардиолага ўша мағлубият жуда оғир ботган бўлса керакки, кейинги ўтказилган беш ўйинда беш ғалаба, тўплар нисбати – 10:0. Мана, «Челси» ўзи учун янги даврга кириб келаётган бўлса, дастлабки қадам, балким «Манчестер Сити» дарвозасини ишғол қилишдан бошланар?
БОШҚА ЎЙИНЛАР
20 май. ТОТТЕНҲЭМ – Брентфорд (16:30), Борнмут – МАНЧЕСТЕР ЮНАЙТЕД (19:00), АТАЛАНТА – Верона (21:00), Ноттингем Форест – АРСЕНАЛ (21:30), МИЛАН – Сампдория (23:45), БАРСЕЛОНА – Р.Сосьедад (23:55)
21 май. БРАЙТОН – Саутҳэмптон (18:00), Аусбург – БОРУССИЯ Д (20:30), НАПОЛИ – ИНТЕР (21:00), Валенсия – РЕАЛ МАДРИД (21:30), Удинезе – ЛАЦИО (23:45), Осер – ПСЖ (23:45)
22 май. РОМА – Салернитана (21:30), Эмполи – ЮВЕНТУС (23:45).
