Еврокубоклар каби, миллий чемпионатларда ҳам ҳал қилувчи палла етиб келди. Францияда «ПСЖ» чемпионлик сари сўнгги қадамларини қўйса, «Барселона» шу ҳафтадаёқ Испания чемпионига айланиши мумкин. Англия ва Германияда эса бу масала сўнгги ҳафтагача давом этадиган кўринади. Бундан ташқари, ЕЧЛ йўлланмалари учун, лигада жон сақлаш учун курашлар ҳам авж паллага етиб келган. Ҳафтанинг энг муҳим ва қизиқарли учрашувлари навбатдаги анонсимизда:
ЛИДС – НЬЮКАСЛ (13 май, 16:30)
Англиядаги навбатдаги тур анча қизиқарли ва муҳим тўқнашув билан бошланади. «Лидс» АПЛда ўз ўрнини сақлаб қолиш бор имкониятини ташлашда давом этмоқда ва ҳатто яқинда бу вазифа бўйича ўзига яраша тажрибали бўлган Сэм Эллардайсни олиб ҳам келди. «Катта Сэм»нинг дастлабки ўйини муваффақиятли чиқмаган бўлса-да, рақиб «Манчестер Сити» эди ва ортиғини даъво қилиш ҳам қийин масала. Энди эса жамоа қолган уч турда «Ньюкасл», «Вест Ҳэм» ва «Тоттенҳэм»дан очколар олишга тўғри келади. Асосий рақиблар «Лестер», «Эвертон» ва «Ноттингем Форест». Рақибларда ҳам тақвим у қадар осон эмас, демак «Лидс» учун ҳар бир очко жуда қадрли.
Худди шу мулоҳазани «Ньюкасл»га нисбатан ҳам ишлатиш мумкин. Эдди Ҳау жамоасининг кучли тўртликдаги ўрни анча хавфсиз кўринган бўлса-да, «Арсенал»дан учралган мағлубиятдан кейин, бунинг устига «Ливерпуль»нинг қаторасига ғалабага эришаётгани бироз хавотирга солиб қўйди. Жадвалнинг қуйида кураш анча қизғинлиги учун ўткинчи ўйинлар йўқ, демак ҳали ўйнаш керак. «Ньюкасл» «Лидс»дан ташқари, «Лестер» билан, еврокубоклар учун тўғридан тўғри рақиб – «Брайтон» ҳамда таркиб жиҳатидан барибир кўп нарсага қодир бўлган «Челси» билан сафарда ўйнайди. Бу ўйинлардаги икки мағлубият «Ньюкасл»ни умуман бешинчи ўринга тушириб юбориши ҳам мумкин. Демак, жамоа мавсум давомида ҳар қанча барқарор кўринган бўлмасин, сўнгги ўйинларда ҳам ўша даражани сақлаб қолиши шарт. Босимни бироз камайтириш, кейинги ўйинлардаги қўшимча ишонч учун ҳам «Лидс» сафари жуда муҳим.
Биринчи даврадаги ўзаро ўйин ҳам «Ньюкасл» учун осон кечмаганини, ўтган йилнинг сўнгги оқшомида ўтган учрашувда ҳисоб очилмаганини ҳам эслатиб ўтиш жоиз. Ўшанда мезбонлар 7та ўта хавфли вазият яратган ва бирортасидан ҳам фойдалана олмаганди.
Таркиблар борасида йўқотишлар у қадар кўп эмас. Мезбонлар сафида Даллас ва Купернинг ўйнай олмаслиги аввалдан маълум эди. Ҳау жамоасида эса Шон Лонгстафф ҳали машғулотларга қайтгани йўқ. Ричи, Крафт ва Ласселс каби футболчилар эса мавсум охиригача сафдан чиқишган. Шунингдек, сўнгги ўйинларда Сан-Максимен яхши формада эмас ва унинг ушбу ўйинда ҳам асосий таркибда кутмаган маъқул.
БАВАРИЯ – ШАЛЬКЕ (13 май, 18:30)
Бундеслиганинг етти карра чемпиони, шу асрнинг ўзида беш маротаба чемпионатда кумуш медални қўлга киритган, ҳатто Чемпионлар Лигаси яримфиналида ҳам ўйнашга муваффақ бўлган «Шальке»нинг бугунги ҳолати ачинарли – жамоа қаторасига иккинчи маротаба Бундеслигани тарк этиши мумкин. Ўтган сафарги муваффақиятсизликдан сўнг дарҳол юқорига қайтишни уддалаган жамоага иккинчи тушиш бироз қийинчилик туғдириши турган гап. Хуллас, «Шальке» 3 тур қолганда 18 жамоа ичида 15-ўринда турибди, аммо орқадаги «Штутгарт» ва «Бохум» атиги 2 очко ортда бормоқда, холос. Бунинг устига рақибларга нисбатан рурликларнинг тақвими бироз қийин эканини таъкидлаш керак – «Шальке» «Бавария»дан сўнг «Лейпциг» ва «Айнтрахт»га қарши ўйнайди.
«Бавария» эса ўтган ҳафта яна чемпионлик масаласини ўз қўлига қайтариб олди. Мюнхенликлар қолган уч ўйинда ғалаба қозонса кифоя, «Боруссия» қандай натижа кўрсатишидан қатъи назар қаторасига 11-маротаба мамлакат чемпионига айланади. Албатта, бу натижа «Бавария» учун янги рекорддир. Нагелсманнинг ўрнини эгаллаб, ҳам Чемпионлар Лигаси, ҳам Германия кубогини бой берган Тухель учун албатта, мавсумни соврин билан якунлаш жуда муҳимдир. Акс ҳолда, бу нафақат Тухелнинг, балки бутун бошқарувнинг катта шармандачилигига айланиб кетади. «Шальке»дан сўнг жамоа ЕЧЛ ўринлари учун аёвсиз кураш олиб бораётган «Лейпциг» билан ўйнайди – ўзини бемалол ҳис қилиш учун «Шальке»ни ютиш шарт.
Умуман агар ўзаро ўйинларга эътибор қаратсак, меҳмонларда имконият деярли йўқдек. Барча мусобақаларда 11 ўйиндан бери «Бавария»нинг қўли баланд келмоқда. Охирги 6 ўйинда ҳатто «Шальке» бирорта ҳам гол ургани йўқ – умумий ҳисоб – 23:0. Мюнхенда ўтган сўнгги тўқнашувда, ўша «Шальке» лигани тарк этган мавсумда «Бавария» рақиби дарвозасига 8та жавобсиз гол урганини ҳам таъкидлаш лозим. Давом этсак, «Шальке» «Бавария» устидан Бундеслигадаги сўнгги ғалабасини 2010 йилда қўлга киритган экан. Ўшанда «Шальке» дарвозасини Нойер қўриқлагани, ҳужумда эса Раул тўп сурганини айтсак, нақадар узоқ вақт ўтганини яхшироқ ҳис қилишингиз мумкин.
Учрашувда «Бавария»дан Дэйвис, Шупо-Мотинг, Эрнандес ва Нойерлар ўйнай олишмайди. Меҳмонлар сафида Ралф Ферманн, ҳамда Козукиларнинг жароҳати бор.
ЭВЕРТОН – МАНЧЕСТЕР СИТИ (14 май, 18:00)
Пеп Гвардиола «Эвертон» сафарини икки ҳафтадан бери алоҳида тилга оляпти. Биринчидан, қолган рақиблари ичида фақат «Эвертон»га очко сув ва ҳаводек зарур. Айниқса, ўз майдонидаги ўйинда табиийки, Шон Дайч жамоаси борини ташлайди. Иккинчидан, айнан «Эвертон» билан баҳс «Сити»нинг «Реал»га қарши яримфинал ўйинлари орасида рўй бермоқда. Гвардиола ва «Манчестер Сити»нинг узоқ йиллик орзуси ЕЧЛ ҳам эканини, АПЛ учун ҳам узоқ ва машаққатли йўл босиб ўтилганини эътиборга олсак, «қайси бармоқни тишлашнинг фарқи йўқ, оғрийди». Гвардиола мана шу шартларда, учала ўйинга ҳам шогирдларини тайёрлай олиши шарт. Ахир требл осон эмас, тўғрими?
«Эвертон» ўтган турда Брайтонда ажойиб ғалабага эришди. Икки кун олдин «Манчестер Юнайтед»га қарши қийин учрашув ўтказган «Брайтон» ливерпулликлар учун ўлжа бўлди. Ўхшаш ҳолат, яна бу сафар ҳам «Эвертон» ҳафта ўртасида Мадрид сафарига чиққан рақибга қарши майдонга тушади. Ҳеч бўлмаса, жисмоний томондан устунлик бўлиши керак. Охирги 4 ўйиндан фақат биттасида мағлуб бўлгани аутсайдер учун яхши натижа. Шунингдек, «Эвертон» биринчи даврада «Этиҳад»дан ҳам очко билан қайтганини инобатга олиш лозим. Ўтган йили «Гуддисон»да ўтган ўйинда эса фақат 82-дақиқада урилган ягона гол «Манчестер Сити»га ғалаба олиб келган эди. Табиийки, «Арсенал» мухлисларининг ҳам бор эътибори ушбу баҳсга қаратилиши табиий.
Албатта, қўшимча интригалар ҳам бор. Ҳоланд яна гол урадими ва умуман ўзига тегишли лига рекордини нечта голгача ошириши мумкин? Яна бир қизиқ жиҳат – «Эвертон» қачонки чемпионлик курашида «Ливерпуль» билан рақобатлашган мавсумларда «Сити»га очколарни тўлиқ «берган». Бошқа мавсумларда эса бирор марта «Манчестер Сити» «Эвертон»ни икки марта ютишнинг уддалай олмаган. Хўш, биринчи даврадаги дуранг етарлими ёки худди Гвардиоланинг илк мавсумидек, «Эвертон» икки марта «Манчестер Сити»ни оёғидан чалий оладими?
ЭСПАНЬОЛ – БАРСЕЛОНА (14 май, 23:55)
Бу ўйинни кўриш шарт. Ўзи шундоғам дерби ва биз «Эспаньол»нинг Каталония дербисида «Барселона» билан жиддий курашишини яхши биламиз. Иккинчидан, «Эспаньол» ҳозирда турнир жадвалида 19-ўринда бормоқда ва лигада қолиш имкониятини берувчи ўриндан 3 очко ортда боряпти. Бу ўйиндаги мағлубият жамоани Сегундага янада яқинлаштириб қўяди. Учинчидан, бу ўйиндаги ғалаба «Барселона»ни «Наполи»дан сўнг, кучли бешликдаги иккинчи чемпионга айлантиради. Хави шогирдлари «Атлетико»дан 13 очкога олдинда бормоқдалар ва тўрт тур қолганда ҳам бу фарқ сақланса, «Барселона» ўз тарихида 27-бор расман Испания чемпионига айланади. Албатта, бундай байрамни ўтказиб юбормаслик лозим.
ФЕЙЕНОРД – ГОУ ЭҲЕД ИГЛС (14 май, 19:45)
Одатда Эрдивизияга боқмасак-да, бу сафар бир учрашувга эътибор қаратишни лозим топдик. Зеро «Фейенорд» жамоаси агар ушбу турда ғалаба қозонса, «ПСВ» билан ўртадаги 8 очколик фарқни сақлаб қолади. Бу эса мавсум тугашига 2 тур қолганда расман чемпионликни нишонлаш учун етарлидир. Ўз майдонида ўртамиёна клубга қарши ўйинда керакли уч очкони олиш «Фейенорд» учун қийин бўлмаса керак. Бу чемпионлик «Фейенорд» учун тарихда ўн олтинчи бош соврин бўлади. Клуб сўнгги бор 2016/17 мавсумда Нидерланияда тенгсиз деб топилганди.
БОШҚА ЎЙИНЛАР
13 май. Салернитана – АТАЛАНТА (18:00), Астон Вилла – ТОТТЕНҲЭМ (19:00), МЮ – Вулверҳэмптон (19:00), Специя – МИЛАН (21:00), ВИЛЬЯРЕАЛ – Атлетик (21:30), БОРУССИЯ Д – Боруссия М (21:30), ИНТЕР – Сассуоло (23:45), РЕАЛ МАДРИД – Хетафе (23:55), ПСЖ – Аяччо (23:55)
14 май. АРСЕНАЛ – Брайтон (20:30), ЛЕЙПЦИГ – Вердер (20:30), Болонья – РОМА (21:00), ЮВЕНТУС – Кремонезе (23:45)
15 май. Лестер – ЛИВЕРПУЛЬ (23:55).
