«Тоттенҳэм» клуби жамоа бош мураббийи Антонио Конте билан расман хайрлашди.

Лондон клуби расмий сайти «Тоттенҳэм» ва италиялик мураббий ўртасидаги келишув икки томоннинг розилиги билан бекор қилинганини эълон қилди. Мавсум якунига қадар Кристиан Стеллини бош мураббий вазифасини бажарувчи этиб тайинланди, Райан Мэйсон эса унинг ёрдамчисига айланди.

Мэйсон Моуриньодан кейин ҳам «Тоттенҳэм»да бош мураббий вазифасини бажарувчи этиб ишлаган эди.

Эслатиб ўтамиз, Конте «Тоттенҳэм»да 2021 йилнинг ноябрь ойида иш бошлаганди. Унинг қўл остида жамоа ўтган мавсумни 4-ўринда якунлаган эди. Ҳозирда ҳам жамоа АПЛда 4-ўринда бормоқда.

Аввалроқ, Конте қўл остидаги футболчиларни жиддий танқид қилиб, уларни иродасиз экани ҳақида гапиргач, жамоа ўйинчилари ва мураббий ўртасида келишмовчилик юз бергани ҳақида хабарлар тарқалганди.