Юнусобод спорт мажмуаси мезбонлик қилган дзюдо бўйича Тошкент «Катта дубулға» турнири якунланди. 

Дунёнинг 49 мамлакатидан ташриф буюрган спортчилар ўртасидаги беллашувларда Ўзбекистон жамоаси умумжамоа ҳисобида Япониядан сўнг 2-ўринни эгаллади. 

Мусобақада мезбонлар 3та олтин, 1та кумуш, 4та бронза — жами 8та медалга сазовор бўлишди. Муроджон Йўлдошев (-73 кг), Давлат Бобонов (-90 кг) ва Алишер Юсупов (+100 кг) ўз вазн тоифаларида тенгсиз бўлишди. Сардор Нуруллаев (-66 кг) кумуш медаль қўлга киритган бўлса, Достон Рўзиев (-60 кг), Муҳриддин Тиловов (-66 кг), Мусо Собиров (-81 кг) ва Гулноза Матниёзова (-70 кг) бронза медали соҳибига айланишди.

Маълумот учун, бу натижа Ўзбекистон дзюдо жамоаси учун «Катта дубулға» турнирлари доирасида рекорддир.