«ПСЖ» ҳужумчиси Неймар туғилган куни олдидан жамоанинг кетма-кет иккинчи ўйинини ўтказиб юборади.

Франция клуби бразилиялик футболчининг эртага, 4 феврал куни бўлиб ўтадиган «Тулуза»га қарши Лига 1 22-тур баҳсида майдонга тушмаслигини маълум қилди.

Неймар мушакларида ноқулайлик сезмоқда. Шу сабаб у индивидуал тарзда шуғулланиб туради ва кейинги ҳафта бошида умумий гуруҳ машғулотларига қайтади.

Неймар 1 феврал куни бўлиб ўтган 21-турдаги «Монпелье» — «ПСЖ» (1:3) ўйинини ҳам ўтказиб юборганди. Ўшанда ҳужумчи мушаклар зўриқиши туфайли майдонга тушмаганди.

5 феврал куни Неймар 31 ёшга тўлади. Ўтган йил феврал ойи бошида ҳам бразилиялик футболчи жароҳатда эди — ноябр ойидан бери майдонга тушмаётганди.