Пеп Гвардиола Микел Артетанинг «Манчестер Сити»дан «Арсенал»га ўтганини эслади.

Испаниялик мутахассис «Манчестер Сити»да Гвардиоланинг ассистенти сифатида ишлаган, 2019 йилнинг 19 декабрь куни эса «Арсенал» бош мураббийи сифатида фаолият бошлаганди. 

«Агар мен ҳам ёрдамчи мураббий бўлиб ишлаганимда ва «Барселона»дан таклиф олганимда кетган бўлардим. Чунки чақирув менинг клубимдан бўлганди. Артета ҳам ўз жамоасини танлади. Мен «жамоада қол ва янги шартномани имзо», дея қатъий туриб оладиган кишилар тоифасидан эмасман. Инсон қаерда ўзини кўпроқ керакдек ҳис қилса, қаерга боришни истаса, ўша ерга бориши керак», - дейди «Манчестер Сити» бош мураббийи.

Маълумот учун, Артета мураббийлигидаги «Арсенал» АПЛда 19 ўйиндан кейин 50 очко билан пешқадамлик қилаётган бўлса, Гвардиола устозлигидаги «Манчестер Сити» 20 ўйиндан кейин 45 очко билан 2-ўринда бормоқда. 

«Сити» Англия кубоги 1/16 финали доирасида 27 январь оқшомида ўз майдонида «Арсенал»га қарши саф тортади.