«Арсенал» собиқ ҳужумчиси Тьерри Анри «канонирлар»нинг «Манчестер Юнайтед»га қарши ўйинидан (3:2) кейин рақиб жамоа бош мураббийи Эрик тен Ҳагни мақтади.

«Арсенал» иккинчи бўлимдаги ўйини эвазига муҳим ғалабага эришганидан жуда хурсандман. Аммо «Манчестер Юнайтед» тен Ҳаг қўл остида мутлақ бошқа жамоага айланганини эътироф этиш керак. Очиғини айтаман, унинг мухлисига айланиб боряпман. Куман «Барса»дан истеъфога чиқарилганда айнан уни Жоан Лапортага тавсия қилгандим. Чунки у даҳо. 

Унутмаслик керакки, Артета бу жамоани 3 йилда қурди, тен Ҳаг эса ярим йилда шу кўринишга келтирди. Қолаверса, «Арсенал» бир ҳафта дам олди, «Юнайтед» эса икки кун дам олиб ҳам деярли тенгкураш тақдим эта олди. Аслида «канонирлар» ўйин бошидан устунлик қилишини кутгандим, аммо рақиб биринчи бўлимда яхшироқ кўринди. «Юнайтед» тен Ҳагга вақт берса ва трансфер ойналарида қўллаб-қувватласа, «МЮ» унинг қўл остида Фергюсоннинг давридан-да жозибалироқ ўйнайди. Бунинг учун унга бир йил вақт беринг», - дейди Тьерри Анри ўйиндан кейин.