«Ливерпуль» бош мураббийи Юрген Клопп АПЛ 19-туридан ўрин олган «Брентфорд» (1:3) билан ўйиндан сўнг ўз фикрларини билдирди.

Германиялик мутахассис ҳакамлар «асаларилар»нинг учинчи голини ҳисоблаганидан норози бўлди. Гол уришдан олдин рақиб ҳужумчиси Мбеумо «Ливерпуль» ҳимоячиси Конате билан яккакурашга киришди ва уни йиқитиб, бирга-бир вазиятдан гол урди. 

«Учинчи гол бундай осон бўлмаслиги керак! Бу ҳақда ҳакамлар билан мулоқот қилишга уриниш микротўлқинли печим билан гаплашишга ўхшайди. 

Ҳакам буни тушунтириши керак. Мавсум бошланишидан олдин йиғилиш ўтказилганди. Жарима майдончасидаги бундай хатти-ҳаракатлар учун ҳуштак чалиниши керак. Улар эса... 

Фойдамизга қарор қабул қилишларини кутмайман. «Брентфорд» ҳимояда эмас, балки ҳужумдаги стандарт вазиятларда кучлилигини таъкидлай оламан. Аммо учинчи голни қабул қила олмайман», — деди Клопп Sky Sports нашрига. 

Беллашувнинг бош ҳаками Стюарт Эттуэлл эди. Даррен Инглэнд эса ВАР тизимига жавобгар эди.