Аргентина миллий жамоаси бош мураббийи Лионель Скалони Хорватияга қарши ўйин олдидан Нидерландияга қарши пенальтилар сериясидан кейин шогирдлари танқидга лойиқ эмаслигини айтиб ўтди.

Аргентина ЖЧ-2022 чоракфиналида Нидерландия устидан ғалаба қозонгач (2:2, пенальти – 3:2), аргентиналик футболчиларнинг нидерландиялик ўйинчиларга қарата ҳаракати рақибнинг норозилигига сабаб бўлганди. 

«Бизга нисбатан танқид тошлари ноўрин. Биз ютишни ҳам, мағлуб бўлишни ҳам биламиз. Саудия Арабистонига қарши ўйинда мағлуб бўлганимизда, буни тан олиб тинчгина меҳмонхонага йўл олгандик. Провокациялар чиқариш ёки жанжаллашишга уринганимиз йўқ.

Бразилияда ўтган Америка кубогида ғолиб бўлганимизда футболда бўлиши мумкин бўлган энг чиройли манзарага барча гувоҳ бўлган: Месси, Неймар, Паредес ва бошқа ўйинчилар «Маракана» стадиони трибуна остида ўзаро қучоқлашган ва гаплашиб ўтиришганди. 

Бизни ғалаба юкини кўтара олмасликда айблаётганлар фикрига қўшилмайман. Бундай қарашлардан воз кечиш керак», - дейди аргентиналиклар устози. 

Эслатиб ўтамиз, Аргентина ЖЧ-2022 яримфинали доирасида 13 декабрь куни Хорватияга қарши майдонга тушади. Ўйин соат 23:59да бошланади.