«Ливерпуль» яримҳимоячиси Луис Диас тиззасидаги жароҳати сабабли жарроҳлик амалиётини бошдан кечирди.

Октябрь ойидан буён ўйнамаётган колумбиялик футболчи жамоанинг қишки йиғинига қўшилган эди. «Ливерпуль» билан Дубайга машғулот ўташга борган Диас тиззасидан оғриқ сезгач, яна Англияга қайтишга мажбур бўлган. Тиззасидан ўтказилган операциядан кейин Диас камида 3 ойга сафдан чиққани маълум қилинди.

«Бу биз учун жиддий зарба ва йўқотиш. Машғулотдаги оддий вазиятда оёғида оғриқ сезди. Эртасига у яна машғулотларга қайтишини кутдик, аммо таваккал қилишни истамадик. Кейин эса кутилмаганда жароҳат жиддийлиги маълум бўлди», - дейди мерсисайдлар устози Юрген Клопп.

Қайд этилишича, Диаснинг жароҳатидан тикланиб сафга қайтиши март ойидан аввал бўлмайди. 

Маълумот учун, 25 ёшли футболчи жорий мавсум АПЛдаги 8 ўйинда 3та гол муаллифига айланган. Клуб 22 очко билан 6-ўринда бормоқда.