Ўзбекистон Суперлигаси 4-туридан ўрин олган «Бунёдкор» — «Динамо» учрашувидан сўнг, самарқандликлар бош мураббийи Предраг Роган матбуот анжуманида иштирок этди.

«Аввало, «Бунёдкор»ни ғалаба билам табриклайман. Жуда катта хатога йўл қўйдик. Футболчимиз кераксиз жойда қизил карточка ишлаб олди. Биз Суперлигада ўйнаяпмиз ва биз кўпроқ тажриба тўплашимиз керак. Кичик вазиятлар футболда кўп нарсаларни ҳал қилиб юборади.

Иккинчи таймда ҳам прессингда ўйнадик. Менинг ўйин фалсафам ҳимояда ўйнаш эмас. Бундан аввалги беллашувларда ҳам худди шундай ўйнагандик. Жамоамиз бироз ёш, уларга мослашиб кетиш учун бироз вақт керак. 

Ҳа, голдан кейин ўйинни бироз ташлаб юбордик. Бу ҳақида футболчиларга ҳам айтдим. Болаларга бироз руҳий хотиржамлик етишмаяпти. Футболчилар ҳиссиётга берилиб кетди. Ҳали бу жиҳат устида ҳам кўп ишлашимиз керак. «Бунёдкор»ни яхши ўрганиб чиққандик: яхши пас бера оладиган, техникаси кучли футболчилар бор. Уларнинг тўпни назорат қилишига қарши прессинг билан ўйнамоқчи эдик. 

Суперлигада бунчалик яхши ўйнашларидан ҳайратда эмасман. Бу лигада қандай зўр жамоалар борлигини ва қанчалик яхши футболчилар ўйнашини жуда яхши билардим. 

Ҳакамлар ҳақидаги савол менга берилиши керак эмас. ВАР футболга қайсидир маънода ёрдам беряпти. Мен реферидан эмас, ўз футболчиларимдан ранжидим. Ҳакамликни баҳолаш менинг ишим эмас. 

Шуни алоҳида айтишим керакки, қанча клубларда ишлаган бўлсам, «Динамо»никидек мухлисларни кўрмаганман. Улар Жиззахга ҳам, Тошкентга ҳам узоқ йўл босиб келиб, жамоани қўллаб туришди», - деди Роган.

Маълумот учун, 4-турда мағлубиятга учраган «Динамо» ҳисобидаги 1 очко билан онлайн жадвалда 13-ўринда бормоқда.