«ПСЖ» клуби жамоа бош мураббийи Маурисио Почеттино билан хайрлашган тақдирда унинг ўрнига асосий номзод маълум бўлди.

Франциянинг энг йирик L’Equipe нашри хабарига кўра, Париж клуби Почеттино ўрнига ёзда жамоага «Атлетико» бош мураббийи Диего Симеонени таклиф этмоқчи. Почеттинонинг «Пари Сен-Жермен» билан шартномаси 2023 йилга қадар белгиланган бўлса-да, жамоа Чемпионлар лигасини тарк этгач мухлислар ва ОАВнинг танқид нишонига айланган мураббий билан келишув мавсум якунида бекор қилиниши мумкин.

Аввалроқ, «Атлетико» бош мураббийи Диего Симеоненинг ҳам «курсиси қимирлаётгани» ҳақида хабар қилинган, бу борада мавсум якунида аниқ қарорга келиниши айтилганди. Маурисио эса ҳали ҳам «МЮ» бош мураббийлигига номзод экани сабабли Франциядан Англияга қайтишга қарши эмаслиги хабар қилинганди.

Эслатиб ўтамиз, бунгача «ПСЖ» Зинеддин Зиданни таклиф этмоқчи экани хабар қилинган, мураббийнинг ўзи эса Франция миллий жамоасида ишлаш ниятини билдиргани маълум қилинган эди.