Ўзбекистон миллий жамоаси собиқ сардори Одил Аҳмедов «Офсайд» кўрсатуви меҳмони бўлиб, миллий жамоадаги фаолиятини нега эрта якунлагани ҳақидаги саволга жавоб қайтарди.

«Аслида миллий жамоадан шу йил эмас, бунданам эрта кетиш ниятим бор эди. 2018 йилги жаҳон чемпионатига чиқа олмаганимиздан кейин халқаро фаолиятимни тугатишга қарор қилгандим. Жаҳон чемпионатининг учта саралаш босқичида ўйнаб бўлгандим. Аммо Эктор Купер келгач, унга қароримни тушунтирган бўлсам-да, у «йўқ, сен бизга кераксан» деб қолдирди. 

Купернинг фаолиятидан кейин Вадим Абрамов бош мураббий бўлгач, у кишига ҳам миллий жамоадан кетмоқчи эканлигимни айтгандим. Лекин Карленович ҳам «Футболимизга кераксан, миллий жамоада тажрибали етакчилар бўлиши шарт», деб мени кўндирганди. Қўлдан келганча ёшларни ҳар тарафлама қўллаб-қувватлашга интилдим. 

Ёзда ЖЧ-2022 иккинчи саралаш босқичи омадсиз якунлангач, тугатиш ҳақида якуний қарорга келгандим ва ўша ҳисобот йиғилишда журналист савол берганида эҳтимол ҳиссиётларга берилгандирман – миллий жамоадаги фаолиятимни якунлаганим ҳақида гапириб, барчага маълум қилдим.

Бундан афсусда эмасманми? Йўқ, мен қилган ишим, қабул қилган қарорларимдан афсусланмайман», - дейди Одил Аҳмедов.

Эслатиб ўтамиз, Одил Аҳмедов 2007 йилдан 2021 йилнинг ёзигача Ўзбекистон миллий жамоаси сафида тўп суриб, жамоа ЖЧ-2022 учинчи саралаш босқичига чиқа олмаганидан сўнг миллий жамоадаги фаолиятини якунлаган эди. 34 ёшли яримҳимоячи Хитой Суперлигаси жорий мавсумида «Цанчжоу Майти Лайонс» сафида 7 ўйинда майдонга тушган.