O'zbek Ўзбекча
Шомуродов «Рома»нинг пешқадамга айланишига ёрдам берди, Яхшибоев ЕЧЛ олдидан гол урди, Рашидовда омадли дебют. Легионерлар ҳафта сарҳисоби 
Душанба, 13 Сентябр
17698

Якунланган ҳафта хориж чемпионатларида тўп сураётган ўзбекистонлик легионерлар учун омадли ўтди. Еврокубоклар ва ОЧЛ олдидан ҳамюртларимиз ўз клубларида ўзларини кўрсата олишди. Элдор Шомуродов «Рома»нинг А Серия пешқадами бўлиб олишига ёрдам берган бўлса, Жасур Яхшибоев Чемпионлар лигаси 1-тури олдидан «Шериф» клуби сафидаги дебютида ўз номига гол ёздириб қўйди. Хориждаги легионнинг дам олиш кунларидаги натижаси билан танишинг. 

Италия: Шомуродовда ассист, «Рома» А Серияда 1-ўринга кўтарилди 

Италия чемпионати 3-турида «Рома» ўз майдонида «Сассуоло»ни қабул қилиб, қўшиб берилган дақиқаларда ғалабани илиб кетди.  

Биринчи бўлимда Кристанте ҳисобни очди, иккинчи бўлим бошида Журичич мувозанатни тиклади. 74-дақиқада Дзаньоло ўрнига захирадан майдонга тушган Шомуродов 90+1-дақиқадада жарима майдони ичида Эль-Шааравини тўп билан таъминлади, Стефан эса супергол уриб, римликларга муҳим 3 очкони келтирди.  

Натижада, «Рома» очколарини 9тага етказиб, тўплар нисбатига кўра А Серияда пешқадам бўлиб олди. Римликлар навбатдаги ўйинда пайшанба куни Европа Конференциялар лигаси 1-тури доирасида Болгариянинг ЦСКА клубига қарши майдонга тушишади.

Молдова: Яхшибоев дебютида гол ва ассистга муаллифлик қилди 

Молдова миллий дивизиони 9-тури доирасида «Шериф» ўз майдонида «Петроклуб» жамоасини қабул қилиб, 2:0 ҳисобида зафар қучди. 

Шу куни Тирасполь клуби сафида Жасур Яхшибоев ўз дебютини ўтказди. Ўзбекистонлик 24 ёшли ҳужумкор яримҳимоячи захирадан майдонга тушиб, 71-дақиқада голга ассистентлик қилган бўлса, 77-дақиқада янги клубидаги илк голини киритди. 

«Шериф» навбатдаги ўйинни Европа Чемпионлар лигаси 1-тури доирасида ўз майдонида «Шахтёр»га қарши ўтказади. Баҳс чоршанба куни соат 21:45да бошланади. 

Россия: Иброҳимхалил Йўлдошев тўп сурган ўйинда клуби камбэк уюштирди 

Россия Премьер-лигаси 7-тури доирасида Иброҳимхалил Йўлдошев тўп сураётган «Нижний Новгорд» клуби иродали ғалабага эришди. 

Кержаков шогирдлари Москвага сафар уюштириб, мағлубиятга учраётганига қарамай, камбэк қайд этди – 1:2. Ўзбекистонлик ҳимоячи шу куни 73 дақиқа тўп сурди. Дебютант жамоа 7-турдан кейин 11 очко билан турнир жадвалида 6-ўринга кўтарилди.

Остон Ўрунов қайдномада ҳам йўқ

РПЛдаги яна бир ўзбекистонлик футболчи Остон Ўрунов бу сафар «Уфа» клубининг қайдномасидан жой олмади. Бошқиртистон клуби Сочига сафар уюштириб, 1:3 ҳисобида мағлуб бўлди. «Уфа» 5 очко билан 13-ўринда бормоқда. 

Қозоғистон: Игорь Сергеев ва «Тобол» - пешқадам 

Қозоғистон чемпионатида тўп сураётган Ўзбекистон миллий жамоаси ҳужумчиси Игорь Сергеев ушбу турда жамоаси билан зафар қучди.

20-турда «Тобол» сафида «Каспий» клубига қарши 46-дақиқада захирадан майдонга тушган Игорь Сергеев ва унинг жамоаси 2:1 ҳисобида ғалаба қозониб, 20 ўйиндан кейин 45 очко билан турнир жадвали пешқадамига айланиб олди. 

Беларус: Умаров ва Абдухолиқов захирадан майдонга тушди 

Беларус Олий Лигаси 22-тури доирасида ўзбекистонлик футболчилар жамоалари сафида майдонга тушишди. 

БАТЭ сафарда «Сморгон» клубини 3:1 ҳисобида мағлуб этди. Ушбу баҳсда борисовликлар сафида Шаҳбоз Умаров 70-дақиқада майдонга тушди. 

«Энергетик» эса ўз майдонида Минскнинг «Динамо» клубига ютқазиб қўйди. Шу куни мезбонлар сафида Мамаду Диалло ўрнига 32-дақиқада майдонга тушган Бобур Абдухолиқов бу сафар ҳам жамоасини мағлубиятдан қутқариб қололмади – 0:1. 

Умаров тўп сураётган БАТЭ 48 очко билан Беларус Олий лигасида 1-ўринда бораётган бўлса, Бобур Абдухолиқов ва Шаҳзодбек Убайдуллаев тўп сураётган «Энергетик-БГУ» 24 очко билан 12-ўриндан жой олган. 

Жанубий Корея: Искандеров захирадан майдонга тушди, Ашурматов йўқ 

Жанубий Корея К-лигасида 29-тур якунланди. Ҳамюртимиз Жамшид Искандеров тўп тепаётган «Сённам» ўз майдонида «Сеул»ни қабул қилди.

1:1 ҳисобида якунланган учрашувнинг 66-дақиқасида Ўзбекистон миллий жамоаси аъзоси захирадан майдонга тушди.  

Яна бир баҳс «Сувон» ва «Канвон» ўртасида ўтиб, унда мезбонлар 1:0 ҳисобида зафар қучишди. Шу куни меҳмонлар сафида Рустам Ашурматов қайдномага киритилган бўлса-да, ўйинга туширилмади. «Сённам» турнир жадвалида 28 ўйиндан кейин 28 очко билан 10-ўриндан жой олган бўлса, «Канвон» 25 ўйиндан кейин 27 очко билан 12 клуб орасида 11-ўринни эгаллаб турибди.

Кувайт: Сардор Рашидовнинг дебюти омадли чиқди 

Ёзда «Кувайт СК» клуби аъзосига айланган Сардор Рашидов дам олиш куни янги жамоасидаги дебютини ўтказди. 

Кувайт Амир кубоги нимчоракфинали доирасида «Кувайт СК» «Ас-Сахел» клубига қарши саф тортиб, 1:0 ҳисобида зафар қучди ва 1/4 финалга йўлланма олди. 

Шу куни мезбонлар сафида асосий таркибда майдонга тушган Сардор Рашидов 80-дақиқагача тўп сурди.  

ОФК Кубоги ғолиблиги учун кураш олиб бораётган «Кувайт СК» 21 сентябрь куни яримфинал доирасида Иорданиянинг «Ас-Салт» жамоасига қарши майдонга тушади.

БАА: Шукуровда 90 дақиқа, «Шаржа»дан камбэк. Навбат ОЧЛ ўйинига 

БАА Про лигаси 3-тури доирасида ўзбекистонлик яримҳимоячи Отабек Шукуров тўп сураётган «Шаржа» жамоаси «Ал Васл» устидан қийин ғалабага эришди. Ўйин давомида 1:2 ҳисобида ютқазаётган шаржаликлар камчиликда бўлишларига қарамай, ўйин охирига қадар ҳисобни 3:2га ўзгартиришди. Шу куни Шукуров 90 дақиқа тўп суриб, жамоасининг фаол ўйинчиларидан бири бўлди. Клуб 3 турда 9 очко жамғариб 2-ўринда бормоқда. 

Отабек Шукуров ва «Шаржа» чоршанба куни ОЧЛ нимчоракфинали доирасида «Ал Ваҳда»га қарши майдонга тушади.

Ушбу турнирдаги яна бир вакилимиз Жалолиддин Машарипов тўп сураётган Саудия Арабистонининг «Ан-Насср» клуби эса сешанба куни Қатарда Эроннинг «Тракторсози» жамоасига қарши майдонга тушади. 

Усмон Ибодов тайёрлади.

Теглар

Ўхшаш янгиликлар