Қарийб 10 йилдан буён хорижлик легионер ва мураббийлардан қарздор бўлган Ғузорнинг «Шўртан» клуби ниҳоят қарздорликлардан қутулди.

ПФЛ директори вазифасини бажарувчи Диёр Имомхўжаевнинг маълум қилишича, Ғузор клуби бир йилдан буён давом этаётган трансфер тақиқидан қутулган.

«ФИФА ва ниҳоят «Шўртан» футбол клубига қўйилган тақиқни расман олиб ташлади. Беларуслик мураббийлар Воривончик ҳам, Криушенко ҳам пулни олганини тасдиқлади. 

Сўнгги 5 ойда Ўзбекистоннинг 5та клуби ФИФА тақиқидан қутулди: «Қўқон-1912», «Нефтчи», «Андижон», «Сурхон», «Шўртан». Айни вақтда ФИФА тақиқи бор клубимиз қолмади. Олдинда эса клублар устидан яна ким қандай шикоят қилишини вақт кўрсатади. ПФЛ эса 2022 йилдан бошлаб бу борадаги талабларни қатъийлаштириш бўйича ЎФА Ижроқўмига таклиф тайёрламоқда», - дейилади телеграмдаги каналда.

Маълумот учун, ушбу тақиқ туфайли «Шўртан» клуби бир йилдан буён янги футболчиларни ўз сафига қўшиб ололмаётган ва бу борада Про лига баҳсларида муаммоларга дуч келаётганди. Сўнгги турда таркибида бор йўғи 11 нафар футболчи қолгани сабабли ПФЛ «Шўртан»нинг «Динамо»га қарши учрашувини кейинроқ муддатга қолдирганди.

Аввалроқ, «Шўртан» 2011-2012 йилги фаолияти учун бош мураббий Игорь Криушенкодан 95 минг АҚШ доллари қарздор бўлиб қолгани ва ушбу маблағ тўлиқ тўлаб берилмагунча клубдан трансфер тақиқи олиб ташланмаслиги маълум қилинганди.