Дания футбол иттифоқи президенти ҳамда УЕФА ижроия қўмитаси аъзоси Йеспер Меллер «Реал», «Манчестер Сити» ва «Челси» клублари Суперлигада иштирок этишини эълон қилгани сабабли Чемпионлар лигасидан четлатилиши лозимлигини таъкидлади.

«Реал», «Манчестер Сити» ва «Челси» клубларини Чемпионлар лигаси яримфиналидан четлатилишини кутяпман. УЕФА Чемпионлар лигасини қандай якунлаши ҳақида бош қотиришига тўғри келади», - дея Меллернинг сўзларини келтирмоқда Goal.

Маълумот учун, «Манчестер Сити», «Челси» ва «Реал» жамоалари ЕЧЛ чоракфиналида «Боруссия», «Порту» ва «Ливерпуль»ни мағлуб этиб, яримфиналга чиққан эди. Ушбу босқичга етиб келган клублар орасида фақатгина «Пари Сен-Жермен» Суперлигага иштирок этишдан бош тортган.

Эслатиб ўтамиз, аввалроқ «Арсенал», «Тоттенҳэм», «Челси», «Ливерпуль», «Манчестер Сити», «Манчестер Юнайтед», «Милан», «Интер», «Ювентус», «Барселона», «Реал» ва «Атлетико» клублари янги ташкил этиладиган Европа Суперлигасида иштирок этишлари ҳақида расман маълум қилган эди. Мадрид клуби раҳбари Флорентино Перес янги турнир президентига айланганди.