«Уфа» «Спартак»дан ўзбекистонлик яримҳимоячи Остон Ўруновни ортга қайтармоқчи, дея хабар бермоқда «РБ Спорт».

Манбанинг ёзишича, уфаликлар раҳбарияти клубнинг собиқ футболчисини қайтариш учун Москва клубига 1 миллион евро тўлашга розилигини билдирган.

Ўрунов мавсум аввалида «Уфа»дан «Спартак»ка 1,5 миллион евро эвазига трансфер қилингани хабар қилинганди. Ўзбекистонлик футболчи жорий мавсумда «Спартак» сафида 9 ўйинда битта голга муаллифлик қилган. Унинг москваликлар билан амалдаги шартномаси 2025 йилга қадар белгиланган.

Аввалроқ, 20 ёшли яримҳимоячига «Рубин» ва «Уфа» клуби қизиқиш билдираётгани, Москва жамоаси Қозон клубидан Ўрунов учун 6 миллион евро сўрагани ҳақида хабар қилинганди. Футболчининг ўзи эса «Рубин»дан таклиф тушганидан хабари йўқлигини билдирган.

Эслатиб ўтамиз, «Уфа» клуби бош директори Ринат Шайбеков Остон Ўруновни ортга қайтаришга тайёрлиги ҳақида гапирганди.