«ПСЖ» собиқ бош мураббийи Томас Тухель ўрнини эгаллаши кутилаётган аргентиналик мутахассис Маурисио Почеттино Париж клубига қайси футболчини таклиф этмоқчи экани маълум бўлди.
Le Parisien нашрининг хабар беришича, Почеттино «Барселона» етакчиси Лионель Мессини Париж клубида кўришни истамоқда. Клуб раҳбарияти ҳам Почеттино 33 ёшли ҳамюртини Франция чемпионатига ўтишга кўндиришига умид қилмоқда.
Месси сингари Почеттино ҳам футболчилик фаолиятини «Ньюэллс Олд Бойз» клубида бошлаган. Янги бош мураббий ўз вақтида «ПСЖ» сафида тўп сурган.
Қолаверса, «ПСЖ» сафида Мессининг дўсти Неймар ҳам тўп сураётгани футболчининг қарорига таъсир қилиши мумкин. Клуб Месси орқали Неймар ва Мбаппени ўз сафида олиб қолмоқчи.
Маълумот учун, Мессининг Каталония клуби билан амалдаги шартномаси 2021 йилнинг ёзида ниҳоясига етади. Лионель жорий мавсумдаги 14 ўйинда 7та голга муаллифлик қилган.
