«Манчестер Юнайтед» яримҳимоячиси Бруну Фернандеш Англия Премьер-лигасининг ноябрь ойидаги энг яхши футболчиси деб топилгач, АПЛ сайтига ўз фикрларини билдирди.
«Бу совринга бир марта бўлса-да эришиш жуда қийин эканлигини биламан. Шундай экан, учинчи бор ой лауреатига айланаётганимдан фахрланаман.
Фақат бу соврин эмас, Англия Премьер-лигаси бош совринига эга чиқсам ўшанда бахтиёр бўламан. «Манчестер Юнайтед»дек катта клуб сафига ўтиб, Англияда фаолият бошлаганимдаёқ ўз олдимга энг аввало АПЛ ғолиблигини бош мақсад сифатида қўйганман. Ўйлайманки, чемпионлик учун «МЮ»да имконият бор», - дейди португалиялик яримҳимоячи.
Маълумот учун, Фернандеш йил бошида «МЮ»га ўтганидан кейин 3-маротаба Англияда ойнинг энг яхши футболчисига айланди. Сўнгги 4 йил давомида АПЛда ҳеч бир футболчи Фернандешдан кўпроқ бу совринга эга чиқмаган. «Манчестер Юнайтед» тарихида ҳам фақат Пол Скоулз (4), Криштиану Роналду (4) ва Уэйн Руни (5) Бруну Фернандешдан кўпроқ бу совринга эга чиққан.
Маълумот учун, «Манчестер Юнайтед» АПЛ 10-туридан кейин 19 очко билан 6-ўринни эгаллаб турибди. Оле-Гуннар Сульшер жамоаси 12 декабрь, шанба куни «Манчестер Сити»га қарши майдонга тушади.
