Испания миллий жамоаси ҳимоячиси Серхио Рамос тарихий рекордни янгилашга яқин, деб ёзади Goal.
«Реал»нинг 34 ёшли футболчиси Нидерландияга (1:1) қарши ўртоқлик баҳсида миллий жамоадаги 176-ўйинини ўтказди ва Европа миллий жамоалари ўйинчилари ичида энг кўп майдонга тушган италиялик 42 ёшли посбон Жанлуижи Буффонга етиб олди. Ҳимоячи яна бир баҳсда иштирок этса, мутлақ рекордчига айланади.
Эслатиб ўтамиз, Рамос Испания миллий жамоасида 2005 йили Хитойга (3:0) қарши ўртоқлик ўйинида дебют қилган. У 46-дақиқада Карлес Пуйоль ўрнига майдонга тушган.
