«Манчестер Юнайтед» яримҳимоячиси Бруну Фернандеш испаниялик яримҳимоячи Андрес Иньеста нега «Олтин тўп»га эга эмаслигига ҳалигача тушунмаслигини айтиб ўтди. 

«Иньеста мен доим ҳавас қилган футболчи саналади. Унинг ўйинларидан завқланардим. Андрес бу – саккизлик ва ўнликнинг қоришмаси, деган бўлардим. Ўзимга ҳам ушбу нуқталарда тўп суриш ёқади. Иньеста тўпни ўзида сақлашни ва таваккал қилишни ёқтиради. У жаҳоннинг энг яхши футболчиларидан бири эди.

Иньеста «Барселона»клуби ва Испания миллий жамоаси сафида эришиш мумкин бўлган барча совринларга эга чиқиб ҳам, «Олтин тўп»га муносиб бўлмаганлиги энг катта адолатсизлик бўлса керак. Унинг ўйинлари ва совринларини кўриб, унга «Олтин тўп» нега берилмаганлигини ҳалигача тушунмайман», – дейди «МЮ»нинг португалиялик яримҳимоячиси Goal нашрига.

Маълумот учун, ҳозирда Япониянинг «Виссел Кобе» клуби аъзоси саналадиган 35 ёшли Андрес Иньеста фаолияти давомида 9 карра Испания чемпиони, 4 карра ЕЧЛ ғолиби, 3 мартада Европа Суперкубоги ва клублар ўртасидаги ЖЧ чемпиони, 2 карра Европа, бир карра жаҳон чемпионлигини қўлга киритган.