Словения бош вазири Янез Янша УЕФА ташкилоти ва унинг раҳбари, ватандоши Александр Чеферинни еврокубокларни ўз вақтида тўхтатмагани учун танқид қилди.

«Бу қарор масъулиятсизлик ва жиноят эди. «Сан-Сиро»да ўтказилган «Аталанта» - «Валенсия» ўйини биологик бомбага айланди. Жаҳон соғлиқни сақлаш ташкилотининг огоҳлантириши УЕФАни Чемпионлар Лигаси ва Европа Лигасини тўхтатишига етарли бўлмади. Бу эса уларнинг фақат пул ҳақида ўйлаётганидан далолат қилмоқда», — деб Янша сўзларини келтирмоқда The World News.

Чемпионлар Лигаси 1/8 финалидан ўрин олган «Аталанта» - «Валенсия» (4:1) ўйини 19 февраль куни Миланда ўтказилди. Баъзи мутахассислар бу баҳснинг ўтказилиши Италиянинг шимолий ҳудудларида коронавирус тарқалишига сабаб бўлгани ҳақида баёнот беришди.

УЕФА фақат 13 март куни еврокубокларнинг тўхтатилишини эълон қилди.

Қайд қилиш жоизки, аввалроқ Чеферин Словения ҳукуматининг иқтисодий чораларини танқид қилган эди. Мамлакат ҳудудида коронавирус юқтириб олганлар сони 1188 нафарни ташкил қилади. Улардан 50 нафари вафот этган.