УЕФА Чемпионлар Лигаси ва Европа Лигаси ўйинлари пайтида клублар томонидан йўл қўйилган турли хил қоидабузарликлар туфайли уларга жазо тайинлади. Бу ҳақда ташкилот расмий сайти хабар қилди.

«Барселона» Чемпионлар Лигаси 1/8 финалидан ўрин олган «Наполи» билан баҳснинг (1:1) кеч бошланганига сабаб бўлгани учун 15 минг евро миқдорида жаримага тортилди.

«Бавария» Лондонда «Челси»га қарши баҳсда (3:0) мухлисларининг провакацион баннерлари учун 20 минг евро, трибунадаги тартибсизликлари учун яна 20 минг евро тўлайди.

«Атлетико» мухлислари «Ливерпуль» билан дастлабки баҳсда (1:0) стадион йўлларини тўсиб қўйганлиги учун 24 минг евро жарима тўлаши керак. Шу жамоаларнинг иккинчи ўйинида эса (2:3) «Ливерпуль» мухлислари пиротехника воситалари ишлатишгани учун Мерсисайд клуби 3250 евро тўлайди.

«Тоттенҳэм» «Лейпциг» билан ўйин (0:1) кеч бошлангани учун 20 минг евро жаримага тортилди. 

Энг катта жаримани «Аякс» тўлайдиган бўлди. Нидерландия клубига Европа Лигаси 1/16 финалидан ўрин олган «Хетафе»га қарши баҳсларда (0:2, 2:1) мухлисларининг нотўғри хатти-ҳаракатлари, майдонга улоқтирилган буюмлар ва бошқа зарарлар учун жами 64 минг 250 евро жарима солинди.