«Ди Си Юнайтед» ҳужумчиси Уэйн Руни 2020 йил январидан бошлаб «Дерби Каунти»да ўйновчи мураббий сифатида иш бошлайди.
Чемпионшип клубининг тасдиқлашича, 33 ёшли футболчи билан 2021 йил ёзигача мўлжалланган шартнома тузилган. Битимда бу муддат яна бир йилга узайтирилиши мумкинлиги белгиланган.
Ўтган ойда Фрэнк Лэмпард «Челси»га бош мураббий бўлиб ўтганидан сўнг «Дерби Каунти»ни Филлип Коку бошқармоқда. Руни кейинги йил бошидан нидерландиялик мураббий бошлиқ штаб таркибига киради.
Эслатиб ўтамиз, Англия миллий жамоасининг энг яхши тўпурари саналувчи, фаолиятининг асосий қисмида «Манчестер Юнайтед»да ўйнаган Уэйн 2017/18 мавсумини «Эвертон»да ўтказиб, сўнг MLS`га йўл олган эди. Жорий мавсумда у Вашингтон округи жамоасининг чемпионатдаги 23та ўйинида қатнашиб, 11та гол урган ва 6та голга ҳаммуаллиф бўлган.
