Лондоннинг «Арсенал» клуби Европа лигаси финали Бокуда бўлиб ўтиши юзасидан баёнот эълон қилди.
«Клубдаги барча Европа лигасининг финал йўлланмаси қўлга киритилганидан хурсанд ва 29 май, чоршанба куни «Челси» билан бўладиган ўйинни сабрсизлик билан кутмоқда.
Шундай бўлса-да, УЕФА 60 минг томошабинга мўлжалланган стадиондан транспорт билан боғлиқ муаммолар туфайли «Арсенал»га максимум 6 мингта ўрин ажрата олганидан кескин норозимиз. Финалга бориб-келиш қийинчиликларини ҳисобга олганда, «Арсенал»нинг 6 минг мухлиси ўйинга бора оладими-йўқми, буни вақт кўрсатади.
Мухлисларимиздан 45 минг нафарида мавсумий абонемент бор. УЕФАнинг стадион танлашдаги қарори туфайли шунчалик кўп мухлис транспорт муаммоси сабаб финални бевосита кузата олмаслиги нотўғри. Аслида финалга чиққан клуб ўз ишқибозларининг чипта борасидаги талабини қондира олмай қолиши керак эди.
Бизга бу ҳақда жуда кўплаб шикоятлар тушди ва биз уларнинг норозилиги бежиз эмас, деган фикрдамиз.
Мухлисларимиз номидан, финал ўйинлари учун стадионлар қайси мезонларга таянган ҳолда танланиши, бу критерийлар орасида мухлислар масаласи қандай ўрин тутишини билишни истаймиз.
Бу мавсумда рўй берган номаъқулчилик яна такрорланиши мумкин эмас, шундай экан биз УЕФАни кейинги сафар финал ўйини учун стадион танлашда мухлисларнинг йўл эҳтиёжлари ва талабларини инобатга олишга чақирамиз», – дейилади «Арсенал»нинг расмий билдиришида.
УЕФА Европа лигаси финали иштирокчилари бўлган «Арсенал» ва «Челси»га 6 мингтадан чипта ажратган. «Тўпчилар» ўтган ҳафта чипталарнинг бундай тақсимотидан норозилигини билдирган эди.
«Жойларнинг бундай тақсимлангани хафсалани пир қилади ва чипталарни содиқ мухлисларимизга тарқатишда бизга жуда катта қийинчилик келтириб чиқаради», – дея таъкидланган эди «Арсенал» расмий сайтида.
Аввалроқ «Ливерпуль» бош мураббийи Юрген Клопп ҳам ўз интервьюларидан бирида Европа лигаси финали учун Озарбойжон пойтахти танланганини «кулгили» ва «масъулиятсизлик» деб ҳисоблашини айтган эди.
«Бу қарорни қабул қилганларга нонуштага нима беришган, билмайман. Бу каби қарорларни қабул қилишда етти ўлчаб бир кесиш керак. Бу ерда масъулиятсизлик қилишган.
Шаҳарлар қайси мезонлар асосида танланишини билмайман. Эҳтимол, ўйин вақтида шаҳардаги нарх-навони пасайтириш ёки ҳеч бўлмаса шу ҳолича музлатиб қўйиш бўйича олдин келишиб олиш керакдир. Эшитишимча, меҳмонхонадаги 100 фунтлик номерларнинг нархи 2700 фунтга кўтарилиб кетибди», – деганди Клопп.
Маълумот учун, Бокудаги «Олимпия» стадиони 68700 мухлисга мўлжалланган. Европа лигаси финали 29 май куни бўлиб ўтади.
