«Динамо» бош мураббийи Даврон Файзиев Суперлиганинг 2-туридаги «Сурхон»га қарши ўйиндан (0:1) кейинги матбуот анжуманида қуйидагиларни таъкидлаб ўтди.
«Сурхондарё халқини жамоамиз ва ўзимнинг номимдан Наврўз байрами билан табриклайман, – деган Файзиевнинг сўзларини келтирмоқда Tribuna.uz мухбири. – Ўйинга мухлислар баҳо беришади, биз мураббий ўз ишимизни қиламиз. Мухлисларга ёқадиган ўйин бўлди.
Ким ўйлагандир, Самарқанд жамоаси ҳимояга ётиб олиб ўйнайди, деб. Лекин биз доим мухлисларга ёқадиган футбол кўрсатишимиз керак. Агар юқори марраларни забт этишни хоҳласак, гол уриш керак.
«Сурхон»ни ғалаба билан табриклайман. Ўйин қизиқарли бўлди. «Сурхон»ни ўрганиб чиққандик. Рақибнинг устунлик томони – стандарт вазиятларга кўпроқ эътибор қаратгандик. Афсуски, барибир биринчи дақиқада стандартдан гол ўтказиб юбордик. Ўйиннинг қолган қисми тенг курашлар остида ўтди, деб ўйлайман.
«Сурхон»ни жазолаш учун бизда жуда яхши имкониятлар бўлди, лекин футболда ҳар доим натижа. Натижа бўлмагандан кейин... Ҳужум чизиғи устида ишлашда давом этамиз. Ҳар бир ҳужумчимизга имконият бериб боряпмиз.
Самарқанддан шунча мухлис келиб, бизни қўллаб туришди. Уларга жамоа номидан катта раҳмат айтаман. Бекобод жамоасига қарши тайёргарликни бошлашимиз керак.
Нечта гол уриб, ғалаба қозонишни истагандик? Вазиятга реал қараш керак. «Сурхон»нинг жисмоний ҳолати 90 дақиқага тайёр эмаслигини билардик. Шундан келиб чиқиб, агрессив футбол кўрсатишга ҳаракат қилдик. «Сурхон» ўйинларини кўриб чиққанимизда, қишда ўртоқлик ўйини ўтказганимизда жамоа жисмоний томондан тайёр эмаслигини сезгандим. Шу жиҳатдан устун бўлдик, деб айта оламан.
Ўйинчилар ётиб олиб, вақтни чўзиши футболда бўлиб турадиган ҳолат. Мураббий сифатида ўзим ҳеч қачон футболчиларимга ётиб ол, вақтни чўз деб кўрсатма бермайман. Бугун шундай вазиятлар кузатилди. Футбол мухлислар учун ўйналганидан кейин биз мураббийлар шуни талаб қилишимиз керак. Буни ҳам футболнинг шумчилиги деймизми, ғалабага эришиш йўли деймизми... Эътирозим йўқ.
Гол ура олмагандан кейин натижага эришиш қийин. Барибир 90 дақиқада битта «жинни гол» киритиб кетади ёки хатога йўл қўясиз ва мана сизга натижа.
Жамоа ўйинида ўсиш борми? Бунга мен баҳо беролмайман. Бунга сизлар, мухлислар, мутахассислар баҳо берасизлар. Қачон ўйиндан тўлиқ қониқдим, дейдиган мураббийни кўргансиз? Мураббий натижа бўлса ҳам қайсидир жиҳатдан қониқмайди. Бунга мухлис-мутахассислар баҳо беради.
Биринчи турдаги «Насаф» билан биринчи ўйин бўлгани учун ҳаяжон бор эди, натижада дарвозабон хатоликка йўл қўйди. Бундай хато футболни гўзаллаштириб туради. Кулгили гол бўлса, кўриб куламиз. Шундай ҳолат биринчи турда биз билан ҳам рўй берди. Лекин «Насаф» билан тенгма-тенг курашишга ҳаракат қилдик ва бир очкога эга чиқдик. Шунинг учун бир ўйин кейингисига тўғри келмаслиги мумкин».
Маълумот учун, «Динамо» 3-турни ўз майдонида 6 апрель куни «Металлург»га қарши ўтказади.
