«Атлетико» бош мураббийи Диего Симеоне Чемпионлар Лигасидан ўрин олган «Ювентус»га (2:0) қарши ўйиндаги ножоиз хатти-ҳаракатлари учун УЕФА томонидан жазоланди.

Эслатиб ўтамиз, мадридликлар 2-голни урганидан сўнг, мутахассис мухлисларга қарата уятсиз ишорани қилган эди. Бу иши учун Симеоне 20 минг евро миқдорида жаримага тортилди, аммо ўйинлардан четлатилмади.

УЕФА чиқарган қарорга мутахассиснинг ўз ишидан пушаймон экани ҳам сабаб бўлди. 

«Мен жазодан қутулиб қолиш учун баҳона изламаяпман. Шунчаки, бу ҳаракатимдан азият чекканлардан узр сўрамоқчиман. Кимнидир ранжитмоқчи эмасдим. Ўйин жуда қийин кечди ва ҳиссиётлар жунбушга келди», - деган эди аргентиналик.

«Ювентус» ва «Атлетико» ўртасидаги жавоб баҳси 12 март куни Туринда ўтказилади.