А Сериянинг 18-тури доирасида 26 декабрь куни бўлиб ўтган «Интер»–«Наполи» учрашувида мезбон жамоа мухлисларининг меҳмонлар ҳимоячиси Калиду Кулибалига нисбатан ирқчилик кайфиятида бўлгани юзасидан УЕФА баёнот билан чиқди.

Баёнотда айтилишича, УЕФА ва FIFPro (Профессионал футболчилар ассоциациялари халқаро федерацияси – Tribuna) Италия футболи раҳбарияти томонидан «Интер»га нисбатан санкция киритиб, тезкор чора кўрилганини қўллаб-қувватлайди.

Ҳар икки ташкилот ҳам Кулибалига қарата айтилган ҳақоратларни қабул қилиб бўлмас деб ҳисоблайди ва бундай ҳолатларга футболда ўрин йўқлигини таъкидлайди. Улар итальян футболи раҳбариятининг стадионларда ирқчиликка қарши курашиш учун қўллайдиган ҳар қандай қўшимча чораларини қўллаб-қувватлашини, бу каби ҳолатларга мутлақо йўл қўйиб бўлмаслигини ҳам билдиришган.

Эслатиб ўтамиз, Италия футбол федерацияси қарорига кўра «Интер» навбатдаги иккита уй ўйинини («Беневенто» ва «Сассуоло»га қарши) бўш трибуналарда ўтказади. Бундан ташқари, фанатларнинг «Курва Норд» трибунаси учта ўйинга ёпилади.

Шунингдек, ўйинда қизил карта олган Кулибали ва «Наполи» сардори Лоренцо Инсинье ҳакамга қарата қилган нолойиқ хатти-ҳаракати ва ҳақорати туфайли 2та ўйинга дисквалификация қилиндилар. Бундан ташқари, Инсинье 10 минг евро жаримага ҳам тортилди.