2020 йилги Европа чемпионати финал босқичининг умумий мукофот жамғармаси 371 млн евро этиб белгиланган.

УЕФА расмий сайтида маълум қилинишича, финал босқичи иштирокчиларига тўланадиган бу мукофот миқдори Евро-2016 билан солиштирганда 23 фоизга юқори. Франциядаги қитъа биринчилигида айни сумма 301 млн еврони ташкил этган эди.

Евро-2020нинг барча 24та қатнашчиси камида 9,25 млн евро олади. Гуруҳ босқичи давомида жамоалар ғалаба учун 1,5 млн, дуранг учун 750 минг евродан ишлаб олади.  Нимчорак финалга чиққан жамоаларга 2 млн, чорак финал иштирокчиларига 3,25 млн евро тўланса, яримфиналчилар 5 млн еврони қўлга киритади. Ниҳоят, турнир ғолиби 10 млн, финалчи эса 7 млн евро мукофот билан тақдирланади.

Шу тариқа, мусобақада чемпионликни қўлга киритган жамоа, агар гуруҳ босқичидаги учала ўйинда ҳам ғалаба қозонган бўлса, жами 34 миллион евро ишлаб олиши мумкин. Евро-2016да бу миқдор 27 млн.га тенг бўлган эди.

Эслатиб ўтамиз, 2020 йилги кўҳна қитъа чемпионати илк маротаба минтақанинг 12та шаҳрида бўлиб ўтади. Турнирнинг яримфинал ва финал баҳслари Лондонда ўтиши белгиланган.