19 декабрь куни Тошкентнинг «Локомотив» клуби Азизбек Ҳайдаров, Филип Райевац ва Йован Жокич билан шартнома имзолаганини эълон қилган эди.

Бироқ, ПФЛ бу шартномаларни рўйхатга олмади.

Ташкилот хабарига кўра, 2019 йилги мавсум учун лицензиялаш талабида футболчилар марказлашган тиббий кўрикдан ўтиши белгилаб қўйилган. ПФЛ тиббий хулосалар асосида футболчига ўз клубида ўйнашга рухсат беради. Аммо, «Локомотив» бу футболчиларни тиббий кўрикдан ўтказмаган.

Шу вақтгача легионер футболчилар билан аввал шартнома тузилган ва шундан кейингина улар тиббий кўрикдан ўтказилган. Энди эса шунинг акси бўлади. Яъни, Суперлига ва Про-лигаларнинг бирор клуби легионер футболчилар билан шартнома имзоламоқчи бўлса, аввал уларни расман тиббий кўрикдан ўтказади.  Кейин эса шунинг хулосаси асосида шартнома имзолайди. Маҳаллий футболчилар билан масала ҳам шу йўсинда ҳал этилади. Ушбу талаблар барча клубларга тааллуқлидир, дейилади ПФЛ хабарида.

Бундан ташқари, 2019 йилги мавсум учун қўйилган талаблар ҳам борки, футбол клублари мана шу талаблар ижросини ПФЛ билан муҳокама қилиб олмагунига қадар, бирорта ҳам шартнома рўйхатга олинмайди. Бу жиҳат 14 декабрь куни бўлиб ўтган клуб директорлари билан йиғилишда яна бир бор эслатиб ўтилган.