«Арсенал» яримҳимоячиси Месут Ўзил «Ювентус» ва «Реал» клубларининг собиқ футболчиси Зинедин Зидан ҳамиша ўзининг энг асосий футбол кумири бўлиб келгани ҳақида айтди.

«Зидан билан кўришганимизда шунчалик ҳаяжонга тушган эдимки, кафтимдан тер ажрала бошлаганди. Аммо бу дамда у сокин ва хотиржам эди. Мен у билан кўришганимдан бошим осмонга етган эди.

Мен унинг футбол ўйнаш услубини ёқтирардим: у майдонда совуққонликни сақлаб, доимо ўзидан яхшироқ позицияда турган шеригини қидириб атрофига назар ташлаб ўйнар эди – у худбин эмасди. Уни Мадридда кўрганимдан беҳад мамнун бўлган эдим.

У ҳамиша менинг кумирим бўлиб келган. Ҳозир ҳам баъзида ўйинлардан олдин унинг ўйинлари тасвирланган видеоларни кўриб тураман», - дея ҳикоя қилган Ўзил.