Яримҳимоячи Аарон Рэмси «Арсенал» билан нима учун янги шартнома имзолашдан бош тортгани маълум бўлди, деб ёзади The Guardian.
Аввалроқ Рэмси ва «тўпчилар» раҳбарияти 2019 йил июнида якунига етадиган ўртадаги битимни узайтирмаслиги 15 сентябрда аниқ бўлгани хабар қилинган эди.
Маълум бўлишича, уэльслик футболчи клубда қолиш учун маошини сезиларли равишда оширишларини сўраган. Хусусан, Месут Ўзилнинг ҳафталик маоши 350 минг фунтга етказилгани унда ҳам шунга яқинроқ миқдорда ҳақ олиш истагини туғдирган.
Ҳозирда Рэмсига ҳафтасига 100 минг фунт тўланади. Унга таклиф қилинган 4 йиллик янги келишув шартлари уни қониқтирмаган. «Арсенал» унинг маошини 2 баробарга ошириб, ҳафтасига 200 минг тўлашни таклиф этгани тахмин қилинмоқда.
Бунга қадар футболчининг рад жавобини бериши матбуотда клуб бош директори лавозимида ишлаб келган Иван Газидиснинг «Милан» бошқарувига ўтиши эҳтимоли билан тушунтириб келинган эди. Функционер Рэмсини ўзи билан Миланга олиб кетиши мумкинлиги айтиб келинди.
Шу билан бирга, хавбекка Хитой клубларидан ҳам манфаатли таклифлар тушаётгани ҳақида миш-мишлар тарқалмоқда.
Аввалроқ Рэмсига «Манчестер Юнайтед», «Челси» ва «Ювентус» жамоалари бефарқ қарамаётгани ҳақида маълум қилинганди.
Жорий мавсумда Рэмси клубнинг 7 ўйинида майдонга тушиб, 2 та голга ассистентлик қилди.
Уэльслик ушбу хавбек «Арсенал»га бундан 10 йил олдин «Кардифф Сити»дан келиб қўшилган эди. 2008 йилдан буён Рэмси 3 карра Англия кубоги соҳиби бўлди.
