Россия терма жамоаси бош мураббийи Станислав Черчесов RT нашрига берган интервьюсида нега лавозимида қолишга қарор қилганини изоҳлаб, ЖЧ-2018 да ғолиб чиққан Франция термаси устози Дидье Дешамни мусобақанинг энг яхши мураббийи деб ҳисоблашини айтди.
- Мундиалдан кейин миллий қаҳрамонга айландингиз. Шундан ҳолатда хотиржамлик билан терма жамоани тарк этишингиз мумкин эди, бироқ қолишга қарор қилдингиз. Балки, келгусида термада муаммолар пайдо бўла бошлар...
- Муаммолар доим қаршимиздан чиқиши мумкин. Терма жамоани қабул қилиб олганимда ҳам таваккал қилгандим, ҳеч нарсани уддалай олмаслигимиз ҳам мумкин эди. Агар шу тарзда фикрлайдиган бўлсак, умуман ҳеч қандай ҳаракат қилмаслигимиз яхшироқ бўлади.
Яқинда ҳам айтгандим: ҳаммаси энди бошланади. Ҳа, жаҳон чемпионати тугади, аммо олдинда бизни Европа чемпионати кутиб турибди. Сиз айтган мантиқ билан иш кўрсам, унда биринчи олтин медални олгачгина фаолиятимни тугатишим мумкин.
- ФИФА талқини бўйича йилнинг энг яхши мураббийи бўлиш учун номзодингиз қўйилишини кутганмидингиз?
- Йўқ, бу мен учун энг асосийси эмас. Агар жамоавий иш яхши йўлга қўйилган бўлса, индивидуал совринлар ҳам келишни бошлайди. Агар охирги ўринни олсанг, ҳеч нарсасиз қоласан.
Ўзимни жаҳон чемпионатининг энг яхши мураббийи деб ҳисобламайман. Энг яхшиси – Дидье Дешам, чунки у Франция терма жамоаси билан олтин медалларга сазовор бўлди. Мен учун айнан мана шу – натижа демак.
Эслатиб ўтамиз, ЖЧ-2018 мезбони нимчорак ва чорак финал босқичларидаги Испания ва Хорватияга қарши ўйинларнинг асосий ва қўшиб берилган бўлимлари дуранг (2:2, 1:1) қайд этди. Дастлаб испанлар пенальтилар сериясида мағлуб этилган бўлса, сўнг футбол лотереясида хорватларга ярим финал йўлланмаси бой берилди.
