Ушбу мавсумда бир қатор футболчилар мухлислар кутганидан ҳам ёрқинроқ порлай бошладилар. Лерой Сане, Паулиньо, Муҳаммад Салоҳ шулар жумласидандир. Аммо иқтисодиётдаги машҳур назария футбол осмонида ҳам ишлайди шекилли, баъзи футболчиларнинг порлаши, бошқа юлдузларнинг осмондаги ёруғлигини пасайтирар экан.
Биз аслида бутунлай бошқа футболчилардан ажойиб ўйинларни кутган, мавсум айнан уларга аталишини тахминлар қилмаганмидик? Август ойида бу умидларни исботлашни бошлаган бир қатор футболчиларнинг бугунги ҳолати бироз тушунарсиз бўлиб қолмоқда.
Келинг, ҳикоямиз қаҳрамонларини элас-элас эсимизда қолган мозийдан, икки минг ўн еттинчи йилнинг августидан қидирамиз.
ЖЕРАР ДЕЛОФЭУ
Бир неча йил олдин Испания ёшлар терма жамоаси чемпион бўлганда каталониялик Жерар Делофеу ва мадридлик Хесе Родригес жамоа етакчилари бўлишганди. Кейинчалик, бу икки ёш юлдузнинг тақдири ўхшаш кечди, иккови ҳам суперклубларда қола олмадилар.
Аввалига «Эвертон»да ижара асосида, кейин тўлиқ трансфердан сўнг, кейинчалик эса, «Милан»даги ишончли ўйинлари эвазига Делофеу яна Барселонага қайтгач, футболчи олдида яна бир имконият эшиклари очилгандек эди гўё. Неймарнинг сотилиши, «Барселона»нинг унинг ўрнига футболчи олишга улгурмагани натижасида, Делофеуга асосий таркибга кириб олиш осон бўлиши кутилганди. У бир неча ўйинларда Месси билан яхши тандем ҳосил қилди, бир қатор ўйинларда чиройли голли узатмалар амалга оширди.
Аммо кейинчалик, Валверде ўйин фалсафасини бироз ўзгартирди, қанот ҳужумчиларидан воз кечди, натижада қаҳрамонимиз сўнгги 10 ўйинда атиги 1 марота асосий таркибда, уч марта захирадан майдонга тушди холос. Мавсум давомида Делофеу ҳисобида атиги 1 гол мавжуд. Дембеленинг қайтиши ва январь ойида кутилаётган трансфер футболчининг жамоадаги ўрнини янада пасайтиради ва катта эҳтимол билан ўзига янги жамоа излаши эҳтимол.
Учинчи имконият унда бўлармикин?
АНДРЕА БЕЛОТТИ
Отимнинг ўлишини билганимда, бир қоп сомонга алмаштирардим, дейди халқимиз. Тўғри айтади. «Торино» раҳбарлари агар августга қайтиб қолишганда, Белоттини сотиш ҳақида ўйлашармиди, балки. Ахир унга бир қоп сомон эмас, эллик миллиондан ошиқ пуллар ваъда қилишаётганди. «Манчестер Юнайтед», «Челси», «Арсенал» — бундай трансферлар ҳужумчи учун ҳам янги қадамлар учун эшик очарди балки...
Аммо «Торино» биржа ўйинчиларига ўхшаб, бироз кутишга қарор қилди ва оқибатда, Белотти янги етишиб чиқаётган суперҳужумчи эмас, Иммобиле, Борини каби бир мавсум ўйинчиси экани ҳақида фикрлар ҳам етарлича пайдо бўлди.
Белоттининг статистикаси эса, жуда чатоқ. У «Торино» таркибида сўнгги голини урганига уч ой бўлди. Дастлабки 5 турда 3 гол уриб, эски режимни намойиш қила бошлаган ўтган мавсум тўпурари, ўшандан буён гол ура олмаяпти.
РАДАМЕЛ ФАЛЬКАО
Ажойиб мавсумда «Монако»нинг ҳақиқий етакчиси Радамел Фалькао эди. Аммо таркибдаги Мбаппе, Сильва, Бакойоко, Менди каби ёш футболчилар Фалькаонинг самарали ўйинига замин яратмоқдалар, дейиларди «Монако» ўйини ҳақидаги жуда кўп мақолаларда.
Бу мавсум бошидан Фалькао бунинг аксини исботлашга киришди. Дастлабки 9 ўйинда 13 гол урган колумбиялик юлдуз аслида ўзининг юқорида саналган ижрочиларга қарам эмаслигини намойиш қилаётганди.
Аммо кейинги ўйинлар «Монако» учун ҳам, Фалькао учун ҳам бир текисда кечмаяпти. Фалкао «Монако»нинг сўнгги 20 голининг атиги 2 тасида иштирок этди холос. 1 гол ва 1 пас. Бу вақтинчалик омадсизликми ёки Лемарнинг ҳам жароҳати туфайли Фалькао ўтган йилги «Монако»сини йўқотиб қўйдими? Жаҳон чемпионати олдидан тажрибали футболчи ўзининг юксак спорт формасига қайтишга мажбур, албатта.
САДИО МАНЕ
Ўтган мавсумда «Ливерпуль»ни Манесиз тасаввур қилиб бўлмасди. Футболчининг январда Африка кубогига кетиши жамоага қанчалик қимматга тушганини эсласангиз керак. Ушбу мавсум бошида ҳам у қаторасига уч ўйинда гол киритиб, ўтган мавсумнинг давомини кутишимизга ишора берганди.
Йўқ. Аввалига терма жамоа ихтиёрида олинган оғир жароҳат, кейин эса, Муҳаммад Салоҳнинг ажойиб спорт формаси Маненинг «Ливерпуль»даги ролини сезиларли пасайтирди. Салоҳ ҳам тезкор футболчи, Манедан фарқли равишда мисрлик футболчининг устунлиги, у ҳар қандай шароитда, кичик зоналарда ҳам фойдали ҳаракат қила олади. Мане эса, кўпроқ, тезкор ҳужумларда ва каттароқ зоналарда самарали ўйнай оларди. Икковининг биргаликда майдонга тушириш эса, жамоа таркибидаги мувозанатни бузиб қўяяпти ва Клопп ҳали бу ҳолатга ечим топгани йўқ.
Айниқса, «Эвертон»га қарши ўйинда Маненинг тўпни қулай вазиятда турган шерикларига узатмасдан, ноаниқ зарба йўллаганини мухлислар қаттиқ танқид остига олишди. Бу вазият якунда «Ливерпуль»га қимматга тушди. Августдан буёғига фақат 1 гол урган футболчи ўзини кўрсатиш ўтида ёнаётган бўлиши табиий, аммо аввалги Мане бу вазиятда шерикларининг гол уриши учун имконият яратарди. Ўша Мане кучлироқ эди.
УСМОН ДЕМБЕЛЕ
Бутун ёз бўйи энг кўп муҳокама қилинган уч футболчи бўлса, улардан бири Усмон Дембеледир. У «Барселона»га ўтиш учун дортмундликлар билан жанжаллашди, машғулотлардан бош тортди, оқибатда, трансфер қиймати бўйича ҳатто ҳамюрти Пол Погбани ҳам ортда қолдириб, «Барселона»га келди.
Янги Неймар бўлиш учун барча шароитга эга бўлган Дембеле Барселонадаги илк ўйинда захирадан тушиб, Суаресга голли пас узатди. Жамоада янги учлик пайдо бўлмоқда, деб хурсанд бўлди мухлислар.
Аммо кейинги турда, «Хетафе» билан ўйиннинг бошларидаёқ Усмон оғир жароҳат олди ва йил охиригача сафдан чиқди. «Барселона» барча фронтларда Дембелесиз ҳам пешқадамликни сақлаб келаётган бўлса-да, Усмон бу давр ичида аллақачон жамоа юлдузи бўлиб олиши мумкин эди. Энди ҳаммасини бошидан бошлаш керак.
Ёмон томони, энди Дембеленинг роли Неймарнинг йўқлигини билдирмаслик эмас, шундоқ ҳам яхши рельсга тушиб олган жамоага қўшилиб кетиш бўлади — бу қийинроқ.
ТОМАС МЮЛЛЕР
Аслида, биз бир йилдан бери ўша биз билган Томас Мюллерни кўрмаяпмиз. Трансфер қиймати юз миллионгача чиқиб борган, универсал, тўпурар, хазилкаш Мюллер аввалги мавсум давомида атиги 5 гол ургач, бунинг сабабини тушуниш футболчининг ўзига ҳам қийин бўлганди.
Мюллер бу муваффақиятсизликни омад билан боғлади ва ҳали ҳам юқори потенциалга эга эканини исботлашини айтди. Аммо унинг голсиз ўйинлари давом этмоқда.
Ўртада олинган жароҳат, мураббийлар алмашиши Мюллердаги салбий барқарорликни ўзгартира олмади. Хужумчи ушбу мавсумда атиги 1 маротаба рақиб дарвозасини ишғол қилди холос. Жаҳон чемпионати олдидан, айниқса, Германияда жуда кучли ҳужумкор футболчилар етиши келаётган бир пайтда хавотирли қўнғироқ.
ГЕНРИХ МХИТАРЯН
«Манчестер Юнайтед» мавсумни қандай бошлаганини яхши биласиз. Ўша ўйинларда Генрих Мхитарян асосий фигура бўлганди. Илк уч ўйинда 5 маротаба голли узатмани амалга ошириб, лига рекордини қайд этгач, у учун навбатдаги мавсум қандай ўтишини тахмин қилиш осон туюлганди. Арманистонлик футболчи учун адаптиция тугади. Ана энди ҳаммаси бошланади. Ҳаттоки Мхитарян ҳақида хужжатли фильм ҳам дунё юзини кўрди.
Аммо ўшандан бери Мхитарян фақат 2 гол урди холос. Голли узатмалар кўринмай кетди, сўнгги бир ойда эса, Генрих ҳатто захира ўриндиғида ҳам кўринмаяпти. Мураббий бу ҳолатни бошқа футболчиларнинг ҳақлироқ экани билан изоҳлаётган бўлса-да, ҳозирда «МЮ»да етишмаётган креативнинг айнан шу томондан иқтидорли бўлган Генрихдан изланмаётгани вазиятнинг жиддий эканини кўрсатади. Шундан хулоса қилиш мумкинки, Моуриньонинг футболчидан хафсаласи буткул пир бўлган ва қишда у трансферга қўйилиши ҳақиқатга яқин.
Бу ҳолат аввал пайдо бўлган яна бир тахминни ростга чиқараётгандек. Айтишларича, энг бошидан Мхитарян Моуриньо қизиққан футболчи бўлмаган. Шунчаки, футболчининг агенти Мино Рийола Ибраҳимовичнинг трансферига ёрдам бериш шарти билан Генрихни ҳам Манчестерда қўним топишига сабабчи бўлган.
МАРКО АСЕНСИО
Август ойида ҳамма Асенсио ҳақида гапиргани эсингиздадир? Чемпионлар лигаси финалидаги сўнгги гол муаллифи, мавсум бошидаги «Эл-Класико»ларда «Барселона»ни ажойиб зарбалари билан жазолаган вундеркиндни Бэйл билан солиштира бошладилар, футболчи ҳатто «Реал»га ўз шартларини қўя бошлаганди.
Аммо у пайтларда Асенсио барибир «Реал»нинг захира варианти бўлганини унутмаслик керак. Рақиблар учун ҳам Асенсионинг ўрни ортиқ бўлмаган, кейинчалик, Бэйл ва Роналдунинг майдонга тушмаслиги натижасида ундан асосий футболчи «ясамоқчи» бўлишди — муваффақиятсиз. Блаки бундай босимни ёш футболчи кўтара олмагандир.
Августда, Ла лигада, асосий таркибдаги илк ўйинда дубл қайд этиб, жамоасини мағлубиятдан қутқариб қолган 20 ёшли футболчи кейинги 10 учрашувда атиги 2 гол ура олди холос. Кутилмаганда келган омад Асенсиога бироз зарар келтиргандир, у ҳам иккинчи мавсум инқирозини бошдан кечираётгандир, нима бўлгандаям, келажакда унга омад тилаймиз. Ўйлаймизки, у ўзининг сўнгги тентакона зарбасини ҳали ижро этмади.
ПАУЛО ДИБАЛА
Албатта, Дибалага келганда, у қадар кескин бўлмаслигимиз керак. У ҳали ҳам катта юлдуз, уни ҳали ҳам «Барселона» ва «Реал» ўз сафида кўришга қарши эмас. Аммо ўз даражасида ўлчаганда, ҳозирда мавсум бошидаги Дибалани топиш қийин.
Дастлабки 6 ўйинда икки хет-трик қайд этиб, жами 10 гол урган Дибала Месси ва Роналдунинг кўрсаткичларини кўрсатаётгандек эди гўё. Аммо кейинчалик футболчининг ўйинларида пасайиш сезилди. У кейинги 10 ўйинда атиги 2 гол урди. Гап фақат голда эмас, Дибаланинг сўнгги пайтларда муҳим ўйинларда захирада қолаётгани ҳам эътиборга молик.
Хусусан, «Интер»га қарши мавсумнинг энг муҳим ўйинларидан бирида Аллегри соппа соғ бўлишига қарамасдан, Дибалани асосий таркибга туширмади.
Қаҳрамон Асланов тайёрлади
