O'zbek Ўзбекча
«Нефтчи» ва «Турон» ўйинидаги тартибсизликлар учун жиноят иши қўзғатилди. Ҳакамларга етказилган жароҳат маълум қилинди
Чоршанба, 02 Декабр
21697

Про лига 20-турининг сўнгги доирасидаги «Нефтчи» - «Турон» (0:1) учрашувидан кейин стадионда юз берган тартибсизликлар борасида Ўзбекистон Республикаси ИИВ ҳузуридаги Тергов департаменти баёнот берди.

«Ижтимоий тармоқларда «Нефтчи» ва «Турон» ўртасида вужудга келган жанжаллашув ифодаланган видеотаъсвир ижтимоий тармоқларда тарқалган эди.

Терговга қадар текширув жараёнида аниқланишича, жорий йилнинг 1 декабрь куни соат 14:00 да Фарғонанинг «Нефтчи» ва Ўзбекистон туманининг «Турон» Про лига жамоалари ўртасида «Истиқлол» стадионида ўйин бўлиб ўтган эди. Учрашувда «Нефтчи» жамоаси 0:1 ҳисобида мағлуб бўлди. Ушбу ҳолат «Нефтчи» ПФК ўйинчилари томонидан учрашув ҳакамидан норози бўлиб, жанжаллашган, жанжал давомида ўйингоҳга ташриф буюрган «Нефтчи» жамоасининг тахминан 8 нафар мухлислари майдонга тушиб, тартиббузарликни вужудга келтиришган.

Шу вақтда, «Нефтчи» ва «Турон» жамоалари футболчилари, захирадаги ўйинчилари, мураббийлари ва стадион стюардлари майдонга жанжални тўхтатиш ва тинчлантириш учун тушган, Фарғона вилояти ИИБ ходимлари саъй-ҳаракатлари билан жанжал тўхтатилиб, қонунбузарлар ушланиб, майдондан четлаштирилди.

Жанжал оқибатида бош ҳакамда юз қисми лат ейиш ва танасининг шилинмалари, ёрдамчи ҳакамларда эса таналарининг турли кўринишдаги жароҳатлар етказилганлиги аниқланган.
Мазкур ҳолат юзасидан Фарғона шаҳар ИИО ФМБ ҳузуридаги Тергов бўлими томонидан ЖКнинг 277-моддаси 3-қисми «в» (оммавий тадбирлар ўтказилаётган вақтда содир этилган безорилик ) банди билан жиноят иши қўзғатилиб, тергов ҳаракатлари ўтказилмоқда.

Ҳозирда, жиноят иши доирасида 6 нафар шахс гумонланувчи тариқасида ишда иштирок этишга жалб қилинган бўлиб яна 2 нафар фуқаронинг шахсини аниқлаш чоралари кўрилмоқда.

Бундан ташқари, яна 5 нафар фуқарога нисбатан Ўзбекистон Республикаси МЖтКнинг 183-моддаси (майда безорилик) кўрсатилган ҳуқуқбузарликларни содир этганликлари учун, тегишли тартибда ҳужжатлар расмийлаштирилган.

Тергов ҳаракатлари давом этмоқда ҳамда тартиббузарлик содир қилган барча шахсларни қонун олдида жавоб берилиши таъминланади», - дейилади Тергов департаменти баёнотида.

Маълумот учун, ушбу баҳсдаги ғалаба эвазига «Турон» ўз тарихида илк марта Суперлигага йўлланма олган бўлса, плей-оффда тўп суриши лозим бўлган «Нефтчи»нинг кейинги тақдири ҳақида ЎФА ва ПФЛ расмий баёнот бериши кутилмоқда.

Теглар

Ўхшаш янгиликлар